انا مواطن مصرى و ما عنديش كهرباء

انا مواطن مصرى و  ما عنديش كهرباء فى البيت ست ساعات يوميا
و بما انى ساكن فى الدور التاسع فلا توجد عندى مياه فى الحنفية اغلب اوقات النهار انا و اولادى مع انى باشرب مياه نستله
تم قطع الطريق على سيارتى اكثر من خمس مرات الشهر الماضى لان طبيعة عملى تتطلب منى الانتقال بين الاسكندرية و عدة محافظات
انا مواطن مصرى اضطررت للسفر الى القاهرة فى سيارة مخصوصة لان سائقى القطارات كانوا عاملين اضراب
انا مواطن مصرى باضيع فى اشارات المرور اكثر من ثلاث ساعات يوميا
انا مواطن مصرى بدأت مؤخرا فى الوقوف على محطات البنزين اكثر من 4 ساعات اسبوعيا
انا مواطن مصرى عايز كل واحد فتح صدره و تصدى لقيادة هذه البلد و رشح نفسه فى انتخابات الرئاسة يبقى قدها و يعمل الواجب اللى عليه
انا مواطن مصرى فى انتظار ال200 مليار دولار استثمارات اجنبية بتوع مشروع النهضة
انا مواطن مصرى فى انتظار حكومة النهضة اللى بيقولوا عليها و ماحدش يقولى من غير صلاحيات دى مجرد حجج يغتصب صلاحياته زى ما بيقولوا و الشعب يحميه
انا مواطن مصرى و ما يهمنيش فى اى شىء ان الرئيس يكون بيصلى التراويح علشان يزود حسناته عند ربنا و ما بيعملش من اجل كل الطلبات اللى فوق دى فانا اعتقد ان حسناتها اكثر بكثير